P de papá

Martins, Isabel (2006). P de papá. Ilust. Bernardo Carvalho, trad. Xosé  Ballesteros. Pontevedra: Kalandraka, col. Demademora, [26 pp.]. (ISBN: 978-84-8464-690-7). 

Descrición do formato e contido da obra: álbum ilustrado literario de tapas duras, cun formato cadrado de 22x22, escrito en galego. A cuberta e a contracuberta son complementarias e de diferentes cores. Nelas aparecen os protagonistas da historia expresando o amor dun pai polo seu pequeno ou pequena. Nas gardas aparecen moitas siluetas do papá nas súas diversas facetas, que son un adianto da información da historia. Na portada aparece un papá cunha longa sombra na que dentro está o neno. Indica que o neno ou nena sempre vai ter como referente a figura paterna. Ao longo da historia, empréganse ilustracións visuais de gran tamaño cheas de expresións e sentimentos, contrastadas sempre co fondo. As ilustración ocupan cada unha das páxinas, enmarcando as sucesivas accións que acompañan e recrean a figura do pai e os seus múltiples significados. Nas ilustracións, os protagonistas son un papá e o seu neno ou a súa nena.

A historia recrea a  complicidade entre un pai e o seu pequeno en múltiples situacións, todas elas encamiñadas a facer ao seu fillo feliz. Diferentes cualidades contadas de forma metafórica e expresadas con só dúas palabras que forman estruturas rimadas. Salienta como recurso na construción do discurso verbal e icónico as estruturas bipartitas:  dúas personaxes, dúas cores, dúas palabras…que implican complicidade e unión. Tamén salienta que esta obra foi recoñecida copremio na mención de honra da Leipzig Book Foundation, Best Book Design From All Over the Word, en 2006.

Potencialidades educativas: este paréceme un libro moi axeitado para traballar calquera día do ano, pero especialmente para o Día do Pai. De darse o caso de que  no grupo no que o utilicemos algún neno ou nena non teña pai, isto daranos pé a explicar que non todas as familias son iguais, facendo comprender á infancia que o máis importante é o amor que recibimos da nosa familia, sexa dun pai, dun avó ou dunha tía. Tamén me resulta interesante empregalo para o inicio do traballo da rima en infantil, ó igual que para a aprendizaxe das letras minúsculas.

Recursos en liña:

·         CPEP La caracola. Historia contada pola clase de infantil dos leóns. https://www.youtube.com/watch?v=6RtB_65kMMk (consultado o 23/02/2018)

·         Marqués, Ana (2009) P de papá. revistababar.com. http://revistababar.com/wp/p-de-papa/ (consultado o 28/02/18)

·         Pequefelicidad (2017) 100 cuentos con enfoque montessori de 3 a 6 años. pequefelicidad.com.http://www.pequefelicidad.com/2017/08/100-cuentos-con-enfoque-montessori-de-3.html (consultado o 05/03/18)

·