Amosando publicacións coa etiqueta Emocións.. Amosar todas as publicacións
Amosando publicacións coa etiqueta Emocións.. Amosar todas as publicacións

sábado, 12 de maio de 2018

Bágoas debaixo da cama




Meilán, Ana (2016). Bágoas debaixo da cama. Ilust. Mayo, Marta. Lugo: Ana Meilán, [34 pp.]. (ISBN: 978-84-617-9969-5).

Breve descrición do formato e contido: álbum ilustrado encadernado en cartoné cunhas dimensións de 23 x 25 cm. Na cuberta podemos observar o título da obra con letras grandes entre as que destaca a palabra “Bágoas” polo que xa se anticipa cal será o elemento principal da historia que se contará no interior do libro. No fondo podemos ver ao protagonista cun boneco e un pano cheo de bágoas e a claridade que deixa pasar a porta aberta do cuarto do protagonista. Nunha esquiniña está un anaco da cama do protagonista e debaixo desta o bote de lágrimas que será outro dos elementos principais da historia. Na contracuberta vemos a Simón, o protagonista, de costas camiñando cara ao mundo que o espera fóra daquelas catro paredes. Ademais, podemos apreciar como os botes nos que gardaba as bágoas esta vez están abertos. Na contracuberta tamén podemos ler a seguinte frase: “Que ocorrería se o mundo quedase sen bágoas?”. Nas gardas iniciais tan só vemos un bote ao que aínda non se lle ve a etiqueta, esta revélasenos ao longo do conto e nas gardas finais onde o bote para as “bágoas de chorón” está aberto espallando as bágoas. Na portada podemos ver a Simón recollendo as bágoas do seu boneco. Existen algunhas imaxes a dobre páxina pero a maioría non o son. As ilustracións son moi atractivas debido ás cores intensas que se utilizan e ao perfil en cor negra que lles da profundidade aos personaxes. Nesta obra cóntasenos a historia de Simón, un neno que choraba moito e ao que todos lle dicían “Simón, es un chorón!” e a Simón non lle gustaba que lle dixeran iso. Ata que canso de que todos lle dixesen o mesmo decidiu non volver a chorar diante da xente e gardar todas as súas bágoas, e as dos demais, en botes etiquetados. Cando deixou de chorar por todo, seu pai díxolle que era “un home feito e dereito” e Simón pensou que os homes non choraban, ata que se deu conta de que todas as persoas choran, incluso seu pai. Pasado un tempo Simón chegou á conclusión de que sen bágoas a xente non se entende e que hai bágoas de moitos tipos.

Potencialidades educativas: esta obra é moi adecuada para traballar as emocións e os sentimentos en Educación Infantil e a calquera idade. Ademais, sérvenos para traballar a necesidade de transmitir o que sentimos porque nos axuda a que nos entendan e a comprender o que lle ocorre aos demais. Ás veces, reprimimos as emocións por temor das mofas dos compañeiros ou dos adultos. No conto Simón vese obrigado a cambiar para gustar aos demais ata que comprende a importancia de mostrar as emocións para saber o que sente o outro e poder axudalo cando o precisa, grazas a isto tamén se desenvolve nos nenos a solidariedade e a empatía. Ademais é un libro que rompe cos estereotipos de xénero xa que se nos mostra a un home chorando e a unha muller fontaneira, traballo tradicionalmente asociado ao xénero masculino.

Recursos de interese:
- Cuentos en la nube (2018). Lectura do conto. Youtube. https://www.youtube.com/watch?v=08uPXq_cr1I (Consultado el 12/05/2018).
- Ana Meilán (2017). Descargables para traballar o conto con nenos. https://www.entrenubesycuentos.com/descargas/ (Consultado el 12/05/2018).

venres, 27 de abril de 2018

Sacapenas

  


Breve descrición do formato e contido da obra : álbum ilustrado traducido do inglés. Dispoñible en idiomas como o portugués, o euskera, o catalán ou o galego. Conta con dous símbolos de distinción, estes son o premio Andersen- 2000 e formar parte do plan nacional delectura de Portugal (PLN Portugal). A cuberta desta obra presenta ao protagonista da mesma camiñando desanimado e o nome do autor entre dous sacapenas. A cuberta conta tamén con un marco de estampado étnico, estampado que continua na contracuberta da obra, a cal presenta un pequeno resumo da historia. As gardas de cores, sendo as dúas primeiras unha rosa e outra amarela, e as dúas últimas, unha laranxa e outra verde. Na verde aparece un resumo do que son os sacapenas e a súa procedencia. Este álbum ilustrado conta con imaxes moi coloridas, centradas na páxina eco texto na parte inferior da mesma, por debaixo das ilustracións. Cada páxina é dunha cor distinta, son cores vivas e alegres que fan contraste coas ilustracións grises e escuras para representar as cousas que lle provocan preocupación a Bieito. A obra comeza contando a historia de Bieito, un neno que vive con moitos temores. Aínda que súa nai e seu pai lle intentan axudar, Bieito non consegue durmir por mor das súas preocupacións. A súa avoa descúbrelle un segredo para facer desaparecer ese sentimento de temor, uns bonecos chamados sacapenas...
Potencialidades educativas : os sacapenas son uns bonecos orixinarios de Guatemala, creados para que as nenas e nenos  que non podían durmir polos seus problemas llos contasen ao boneco e o colocasen na almofada antes de durmir. Coa historia de Bieito pódense descubrir preocupacións e temores das cativas e cativos, para poder así axudarlles a solucionalos. O significado dos bonecos sacapenas, axudarannos a traballar as preocupacións das alumnas e alumnos e por outra banda pode servir de modo introdutorio para traballar outras culturas como a de Guatemala neste caso, que é a súa procedencia.

Recursos de interese :
Máis obras do autor: http://www.anthonybrownebooks.com/ (Visto a 26/04/2018).
Información de interese sobre o autor, Anthony Browne:
https://www.fce.com.ar/boletines/chicos31/bioextendidabrowne.htm (Visto a 26/04/2018).
Idea para realizar un teatro de títeres coa obra. Enlace:
https://www.youtube.com/watch?v=856XRi8bCjo (Visto a 26/04/2018).