Amosando publicacións coa etiqueta música. Amosar todas as publicacións
Amosando publicacións coa etiqueta música. Amosar todas as publicacións

luns, 14 de maio de 2018

Ola, ola la!


Sánchez, Gloria (2011), Mamá Cabra Ola, Ola, La! Ilust. Kirstina Sabaite. Vigo: Editorial Galaxia, col. Sonárbore, [28pp.]. (ISBN: 978-84-9865-307-6).

Breve descrición do formato e contido: Mamá Cabra Ola, ola, la! é moito máis que un libro xa que inclúe un CD de música para cantar xunto co grupo musical Mamá Cabra ademais dun DVD-Karaoke. O libro é de formato rectangular (24x21 cm.). Posúe unha cuberta e contracuberta de cartón duro para favorecer a manipulación por parte dos nenos e nenas. A cuberta fainos intuír como serán as ilustracións que atoparemos ao longo de todo o volume. Trátase de imaxes moi vistosas, incluso semellan estar debuxadas por rapaces e rapazas, convidan a deterse minutos observando cada un dos elementos presentes. Así mesmo, as imaxes reforzan e clarifican o que se narra no texto, facilitando a interpretación do conto. 
Este conto relata a historia de Mamacabra e as súas cinco cabritas, que marcharon vivir á cidade. Pouco a pouco as cabritas van marchando ata que Mamacabra fica soa. É entón cando dedica ir a buscar as súas cinco cabritas. Atopa á primeira no mar, á segunda no monte, á terceira en París, á cuarta navegando... pero ningunha volve á casa así que Mamacabra triste e sen ánimo afastouse da cidade. En cada unha das secuencias da historia atopamos unha canción relacionada co texto presente. 

Potencialidades educativas: en canto as potencialidades da obra podemos destacar: 
  • A forma rimada das cancións que facilita á memorización e permite traballar a conciencia fonolóxica. 
  • Vocabulario relacionado coa música, cos alimentos, coas partes do corpo, coas cores, coas formas, coas nocións espaciais, cos animais e plantas e tamén diversas accións. 
  • Traballa os números ata o 5, tanto cardinais como ordinais. 
  • Aborda o tema dunha alimentación saudable. 
  • Podemos traballar o tema das emocións, facendo fincapé na tristeza, presente de forma explícita practicamente durante todo o libro. 
  • Traballar o baile, o canto, os xestos e a imitación a partir de diversas cancións do libro.
Recursos de interese:
  • CEIP Plurilingüe "Anxo da Garda" (2013). Canción "As mans" con pictogramas. https://www.youtube.com/watch?v=xMpK_mlQxUs (Recuperado o 30 de abril de 2018).
  • Mamá Cabra (2011). Ola, Ola, la! https://vimeo.com/22996145 (Recuperado o 30 de abril de 2018).
  • Sonárbore (2015). Canción "Eu son un artista " https://soundcloud.com/sonarbore/eu-son-un-artista (Recuperado o 30 de abril de 2018).

mércores, 25 de abril de 2018

Eu cociño, ti cociñas?



Mosquera Roel, Gloria (2017). Eu cociño, ti cociñas?. Ilust. María Lires, trad. do autor Madrid: Galaxia Editorial, col. Sonárbore [26 pp.]. (ISBN: 978-84-9151-089-5).

Breve descrición do formato e contido da obra: álbum ilustrado escrito en lingua galega. É de formato cadrado, cunhas dimensións de 24x21 cm. A cuberta e a contracuberta son de tapa dura. Na cuberta aparece unha tixola con un peixiño e diferentes hortalizas e na contracuberta aparece unha espumadeira e un ovo nun prato. As imaxes que podemos atopar no seu interior son grandes, vistosas e moi coloristas pensadas para chamar a atención dos nenos e nenas. Ademais en cada receita que aparece no conto, o ingrediente principal e o debuxo que ocupa esa paxina. O texto deste conto consta da propia receita e dunha canción rimada relacionada co ingrediente principal da receita. O conto trae un CD con todas as cancións que neste aparecen.




Potencialidades educativas: os nenos e as nenas descubriran novas receitas que poderán facer cos seus compañeiros. Este conto esta cheo de receitas e de cancións para que os pequenos e pequenas da casa nos deleiten cos mellores sabores, e ademais poderán aprender a cociñar a través da musica, divertíndose a vez. Este libro e adecuado para traballar na aula, para que así os nenos e nenas traballen todos xuntos, e aprendan conceptos novos dunha maneira lúdica


Recursos de interese:

  • Blog do colexio CEIP de Sigüeiro (Oroso, A Coruña). Eu cociño, ti cociñas?. http://eucocinoticocinas.blogspot.com.es/





sábado, 31 de marzo de 2018

A fiestra dos soños



Boquete, Manuel (2018). A fiestra dos soños. Ilust do autor. Vigo: Galaxia, [ 24 pp.]. (ISBN: 978-84-9151-079-6). Libro acompañado por CD.

Descrición do formato e do contido: álbum ilustrado de marcado carácter lírico, que pon en contacto aos máis novos coa estrutura poética dende unha visión musical, literaria e plástica. Encadernado en cartoné de tamaño rectangular (24x21cm) e tapas duras, os seus textos implican  unha esixencia por parte do lector pouco habituado á poesía, obsequiándonos cunhas ilustracións de tipo figurativo, alegres e coloridas, pintadas en acuarela. O contido deste texto vai acorde coas imaxes que amplían os contidos. Consta de 13 poemas acompañados de música. Todos os elementos que aparecen no libro están presentes no contorno diario dos nenos e das nenas, o que favorece o recoñecemento e a identificación con eles. Nalgúns casos o retrouso das composicións está en cor vermella e noutros en laranxa, o que permite identificalo para acompañar o ritmo das cancións e poder repetir estes versos. Algunhas das composicións presentan  versos longos, mentres que outras son máis curtas, o que incide no ritmo de cada poema, nuns casos máis demorado,noutros mais rápido.

Potencialidades: con esta obra pódese traballar a poesía, a música, o ritmo e a rima dende moi tenra infancia. As imaxes coloristas e de marcado ton infantil contribúen a interesarse polo seu contido aos máis pequenos, ao tratar cuestións como a imaxinación, a creatividade, o ludismo e as ganas de aprender, aspectos que xa se intúen polo propio título, que anuncia a entrada ao mundo dos soños. Con esta e outras obras da colección “sonárbore” a editorial Galaxia pon en mans dos docentes e os mediadores unhas ferramentas imprescindibles para  coñecer e valorar o traballo das distintas agrupacións musicais que compoñen en Galica para a infancia.

Recursos:
É de gran interese para os mediadores consultar os seguintes libros:
  • Blanco, Magin e Senlle, Uxía (2015). Canta o cuco. Ilust. Leandro Lamas. Vigo: Galaxia, [28 pp.]. (ISBN: 978-84-9865-648-0 ). Libro acompañado por CD.

  • Uxía (2013). Rosalía pequeniña. Ilust. Marina Seoane. Vigo: Editorial Galaxia, col. Sonárbore, [28 pp.]. (ISBN: 978-84-9865-484-4). Libro acompañado por CD.

xoves, 29 de marzo de 2018

Brinca Vai!


Nogueiras, Paco (2014). Brinca vai!. Ilust. David Pintor. Pontevedra: Kalandraka [56 pp.]. (ISBN: 978-84-8464-877-2).
Descrición do formato e do contido: libro acompañado de cd e dvd de tapa dura. Na cuberta temos figurado a Paco Nogueiras, o autor, coas gafas e o sombreiro que nos axuda a recoñecelo. Ademais, tanto o título como o debuxo está representado dunha forma que simula adquirir movemento, o que anima a abrir o volume para descubrir o que garda dentro. A contracuberta contén a lista de cancións das que se reproduce a letra no libro, que van precedidas polos comentarios laudatorios de diferentes persoas, como por exemplo, Juana Vázquez Silva, coordinadora dunha Biblioteca Escolar. Na parte final do volume tamén se recolle unha entrevista con Paco Nogueiras, no que desvela algúns  “segredos” do Brinca Vai. O contido da obra recolle 12 cancións baseadas en temas como a natureza, os xogos tradicionais ou as festas, como poden ser o Nadal ou o Magosto. Igualmente, ao ler as letras podemos comprobar que está presente o tema da amizade, entre outros. Cada unha das doce cancións conta coa súa imaxe na que aparece, na maior parte dos casos, Paco Nogueiras. As imaxes son de estilo infantil e animadas con cores alegres. As letras das cancións conteñen en letra negra os retrousos das composicións. É de salientar que a obra conta cun DVD de Sr. Sagüillo que está ligado á última parte do libro na que se lle explica aos pequenos e pequenas como poden facer para facer o seu propio videoclip das cancións. O CD danos a oportunidade de facer karaoke coas cancións.
Potencialidades: Brinca Vai! é unha boa maneira de presentar as tradicións aos nenos e nenas. A través da música, do baile e do ritmo, podemos ensinar na aula. Ademais, é unha boa maneira de crear relacións entre os nenos e fortalecer a amizade e compañeirismos. Mentres nos divertimos, os nenos coñecen festividades celebradas en Galicia e en que consisten cada unha delas. Podemos utilizar as cancións para poñer en práctica e mellorar a creatividade dos nenos, xa que poden ser eles mesmos quen propoñan pasos e creen un baile. Outra opción é que en asemblea, unha vez que todos coñezamos as cancións e as saibamos máis ou menos de memoria, un por un propoña un paso para cada cacho e facer un baile cooperativo. Este exemplar é un bo método para introducir o magosto cando estea próximo ou o Nadal. En canto a este último, contamos coa figura do Apalpador para dar a coñecer o Papá Noel galego, xa que a maioría dos nenos e nenas non son conscientes da figura que temos na nosa comunidade. Ademais, os complementos do CD e DVD abren moito o noso abano de posibilidades para traballar na aula.
Recursos en liña:
Representación da canción “Meu o mundo é!” por Paco Nogueiras (2014). No seu perfil conta con máis representacións: https://www.youtube.com/watch?v=F1e0wAcXcgw (consultado o 20/03/2018).
Domínguez, Jéssica (2017). “Brinca Vai!”. En: Primeiraslecturas https://primeiraslecturas.blogspot.com.es/search?q=brinca+vai (Consultado o 20/03/2018).