Amosando publicacións coa etiqueta Ritmo. Amosar todas as publicacións
Amosando publicacións coa etiqueta Ritmo. Amosar todas as publicacións

sábado, 31 de marzo de 2018

A fiestra dos soños



Boquete, Manuel (2018). A fiestra dos soños. Ilust do autor. Vigo: Galaxia, [ 24 pp.]. (ISBN: 978-84-9151-079-6). Libro acompañado por CD.

Descrición do formato e do contido: álbum ilustrado de marcado carácter lírico, que pon en contacto aos máis novos coa estrutura poética dende unha visión musical, literaria e plástica. Encadernado en cartoné de tamaño rectangular (24x21cm) e tapas duras, os seus textos implican  unha esixencia por parte do lector pouco habituado á poesía, obsequiándonos cunhas ilustracións de tipo figurativo, alegres e coloridas, pintadas en acuarela. O contido deste texto vai acorde coas imaxes que amplían os contidos. Consta de 13 poemas acompañados de música. Todos os elementos que aparecen no libro están presentes no contorno diario dos nenos e das nenas, o que favorece o recoñecemento e a identificación con eles. Nalgúns casos o retrouso das composicións está en cor vermella e noutros en laranxa, o que permite identificalo para acompañar o ritmo das cancións e poder repetir estes versos. Algunhas das composicións presentan  versos longos, mentres que outras son máis curtas, o que incide no ritmo de cada poema, nuns casos máis demorado,noutros mais rápido.

Potencialidades: con esta obra pódese traballar a poesía, a música, o ritmo e a rima dende moi tenra infancia. As imaxes coloristas e de marcado ton infantil contribúen a interesarse polo seu contido aos máis pequenos, ao tratar cuestións como a imaxinación, a creatividade, o ludismo e as ganas de aprender, aspectos que xa se intúen polo propio título, que anuncia a entrada ao mundo dos soños. Con esta e outras obras da colección “sonárbore” a editorial Galaxia pon en mans dos docentes e os mediadores unhas ferramentas imprescindibles para  coñecer e valorar o traballo das distintas agrupacións musicais que compoñen en Galica para a infancia.

Recursos:
É de gran interese para os mediadores consultar os seguintes libros:
  • Blanco, Magin e Senlle, Uxía (2015). Canta o cuco. Ilust. Leandro Lamas. Vigo: Galaxia, [28 pp.]. (ISBN: 978-84-9865-648-0 ). Libro acompañado por CD.

  • Uxía (2013). Rosalía pequeniña. Ilust. Marina Seoane. Vigo: Editorial Galaxia, col. Sonárbore, [28 pp.]. (ISBN: 978-84-9865-484-4). Libro acompañado por CD.

Aurelio



Rubio, Antonio (2016). Aurelio. Ilust. Federico Fernández. Pontevedra: Kalandraka, [28 pp.]. (ISBN: 978-84-8464-263-3).

Descrición do formato e do contido: álbum ilustrado que conforma un abecedario de marcado carácter poético e en lingua castelá. Pon en contacto esta estrutura poética cunha visión literaria e plástica. Realizado en cartoné, con tapas duras e bordes redondeados, ten unhas dimensións de 19x19 cm. O protagonista deste libro é un inquieto morcego que se chama Aurelio. Ambas as palabras conteñen as cinco vogais. Comeza con palabras curtas, aquelas que conteñen unha soa vogal, pero vai aumentando de forma sonora coas súas rimas o número de vogais que podes ir unindo para formar palabras máis grandes. Dende o A ata o U, o autor constrúe palabras en pequenas poesías para que os máis cativos se familiaricen co uso das vogais. As ilustracións son moi coloridas e contribúen a crear semellanzas entre os debuxos de obxectos cotiáns e as  letras que o conforman, fomentando así o interese dos cativos sobre os debuxos, para que encontren as vogais e as relacionen co obxecto ilustrado.

Potencialidades: este álbum permite traballar múltiples aspectos que inciden na adquisición da linguaxe. A construción poética asenta no son das vogais, na recreación de formas e na composición de palabras, que van progresivamente graduando a dificultade, dende as monosílabas ata as trisílabas. Salienta tamén a recreación visual nas propias ilustracións, que integran as vogais como un elemento icónico máis, o que redunda no recoñecemento visual das súas formas para os nenos e nenas que están a se familiarizar con estes elementos do abecedario. Salienta a perspectiva lúdica e os diferentes xogos sonoros e visuais que se recrean ao longo da obra, que lle dan vida ás letras e integran elementos figurativos marcados polo humor e o estilo marcadamente persoal de Óscar Villán.  

Recursos:
É de gran interese revisar outra obra deste autor pola intratextualidade que ten coa presente.
  • Rubio, Antonio (2014). Violín. Ilust. Óscar Villán, trad. Manuela Rodríguez.  Pontevedra: Kalandraka, col. Do berce á lúa, [14 pp.]. (ISBN: 978-84-8464-855-0).

xoves, 15 de marzo de 2018

Cores

 



Rubio, Antonio (2014). Cores. Ilust. Leo Lionni, trad. Xosé Ballesteros. Pontevedra: Kalandraka. [ 14 pp.]. (ISBN: 978-84-8464-845-1).

Descrición do formato e do contido: álbum ilustrado, de marcado carácter poético. Realizado en cartoné, con  tapas duras e bordes redondeados, ten unhas dimensións de 16x16 cm, tamaño moi acaído para o fácil manexo dos máis cativos. A escasa presenza textual permite que as imaxes adquiran toda a forza comunicativa. Ademais son  imaxes lexibles, que se articulan de igual modo que as palabras, coas súas sílabas contadas. Imaxes que se dispoñen á maneira dos versos; ordenadas, medidas, con ritmo e rima final. En Cores, os ratiños tínguense de azul, amarelo, verde, vermello ou gris, asociando esas transformacións a distintos elementos ou estados de ánimo. As cores asócianse coa contorna e coas súas emocións, reflectidas  nas expresións do rostro dos ratiños, que aparecen na maior parte dos casos contentos.



Potencialidades:
Con esta obra pódese traballar a poesía, os xogos de rima e conceptos moi sinxelos. Permite xogar co recoñecemento das diversas cores coas que aparecen caracterizados os protagonistas, que van mudando de aspecto en cada páxina. A obra tamén permite unha aproximación aos xogos coa linguaxe, na que xorden as comparacións e as metáforas; e á expresión artística, polos cromatismos e visualismo das imaxes, que promoven a empatía cos animais protagonistas. Outra posibilidade que ofrece a obra é o xogo cos números, ao apareceren dispostos de modo que se poden contar, sumar ou restar en cada dobre páxina.  

Recursos:
É de interese para os mediadores o seguinte libro e vídeos:
  • Rubio, Antonio (2014). Números. Ilust. Leo Lionni, trad. Xosé Ballesteros. Pontevedra: Kalandraka, [ 14 pp.]. (ISBN:978-84-92608-78-2).


xoves, 8 de marzo de 2018

Piñeiro




Rubio, Antonio (2014). Piñeiro. Ilust. Óscar Villán, trad. Manuela Rodríguez. Pontevedra: Kalandraka, col. Do berce á lúa, [18 pp.]. (ISBN: 978-84-8464-856-7).

Descrición do formato e o contido: álbum ilustrado de marcado carácter poético. Realizado en cartoné, con  tapas duras e bordes redondeados, ten unhas dimensións de 16x16 cm, tamaño moi acaído para o fácil manexo dos máis cativos. As súas ilustracións son moi expresivas e de carácter figurativo. Acompañan e recrean uns versos moi breves que asentan na repetición o marcado ritmo musical, identificándose de modo unívoco imaxes e texto. A escasa presenza textual permite  que as imaxes adquiran toda a forza comunicativa. Ademais son imaxes lexibles, que se articulan de igual modo que as palabras, coas súas sílabas contadas. Imaxes que se dispoñen á maneira dos versos; ordenadas, medidas, con ritmo e rima final. Imaxes que poden ser lidas de forma autónoma dende a idade máis temperá. Trátase dun poema completo que se constrúe en base a unha estrutura poética do cancioneiro infantil, no que o autor tamén se serve de recursos propios da tradición oral. . O elemento central é un piñeiro que aparece en cada unha das páxinas e ao que se van asociando outros elementos próximos ao universo infantil, como os xoguetes, a través dos que se abordan conceptos espaciais, como arriba ou abaixo, converxendo todos eles na referencialidade final a un eu protagonista.  Este libro está dispoñible nos seguintes idiomas: galego, castelán e éuscaro.

Potencialidades: 
Con esta obra pódese traballar a poesía, os xogos de rima e os conceptos moi sinxelos. Permite xogar co recoñecemento da disposición espacial dos obxectos (arriba, debaixo, ao lado) que aparecen ao carón do elemento central, o piñeiro. Tamén se presta o volume para facer diversas actividades lúdicas cos nenos e coas nenas como poden ser saídas ao campo, para que eles mesmos experimenten e observen a natureza, fomentando así o seu interese por ela.

Recursos:
É de interese para os mediadores a colección completa destes pequenos pero suxestivos libros, que
leva por título “Do berce á lúa” e que conta con oito entregas. É o caso de
  • Rubio, Antonio (2014). Zapato. Ilust. Óscar Villán, trad. Manuela Rodríguez. Pontevedra: Kalandraka, [14 pp.]. (ISBN: 978-84-92608-77-5).
  • Rubio, Antonio (2009). Crocodilo. Ilust. Óscar Villán . Pontevedra: Kalandraka, [14 pp.]. (ISBN: 978-84-8464-545-0).
  • Rubio, Antonio (2010). Cinco. Ilust. Óscar Villán. Pontevedra: Kalandraka, [12 pp.]. (ISBN: 978-84-8464-542-9).
  • Rubio, Antonio (2012). Lúa. Ilust. Óscar Villán. Pontevedra: Kalandraka, [16 pp.]. (ISBN: 978-84-8464-541-2).
  • Rubio, Antonio (2012). Miau. Ilust. Óscar Villán. Pontevedra: Kalandraka, [16 pp.]. (ISBN: 978-84-8464-543-6).
  • Rubio, Antonio (2012). Paxariña de papel. Ilust. Óscar Villán. Pontevedra: Kalandraka, [16 pp.]. (ISBN: 978-84-8464-544-3).
  • Rubio, Antonio (2014). Violín. Ilust. Óscar Villán, trad. Manuela Rodríguez.  Pontevedra: Kalandraka, [14 pp.]. (ISBN: 978-84-8464-855-0).