Amosando publicacións coa etiqueta Nais. Amosar todas as publicacións
Amosando publicacións coa etiqueta Nais. Amosar todas as publicacións

sábado, 17 de marzo de 2018

Mamá


Ruíz Johnson, Mariana (2014). Mamá. Ilustr. da autora, trad. Manuela Rodríguez. VI Premio Internacional Compostela para álbums ilustrados no ano 2013. Pontevedra: Editorial Kalandraka, [24 pp.]. (ISBN: 978-84-8464-841-3).

Breve descrición do formato e contido da obra: emotivo álbum ilustrado en galego que nos describe o que é unha mamá. O formato do conto é rectangular, cunhas dimensións de 18,5 x 25,5 cm. Cuberta e contracuberta representan unha imaxe conxunta. Na cuberta recréase a escena dunha nai e o seu fillo sentados ao pé dunha grande árbore e un río que transcorre detráss; na contracuberta continúa esta paisaxe coa ilustración dunha nai paxaro cos seus filliños ao carón do mesmo río. As ilustracións figurativas que acompañan o texto ao longo da historia representan imaxes tenras e conmovedoras sobre a maternidade, representada por animais (unha osa, unha crocodrila, unha vaca, unha elefante etc.) acompañadas polas súas crías. Cabe destacar a importancia da presenza da natureza nas vistosas imaxes ilustradas con cores intensas e cálidas: vermellas, laranxas e amarelas. O seu contido inspírase no estilo ornamental da arte popular latinoamericana. Dende o punto de vista cromático, pola forza expresiva e poética das ilustracións, tamén rende homenaxe a pintores como Paul Klee.
En canto ao contido da obra, Mamá vainos explicando páxina a páxina de forma lírica o que é unha nai: “Mamá é tantas cousas… É unha casa morna, redonda e andante. Móstranos camiños atrás e adiante. Tróuxome a este mundo pequeno e espido. Protéxeme sempre pequeno e durmido” Mariana Ruiz Johnson quixo plasmar con esta obra a súa experiencia da maternidade dende un enfoque artístico e literario. Tal como sinala Carina Rodrigues (2015), o texto está construído “como un poema sinxelo, cuxos versos van desfilando paulatinamente ao longo das súas dobres páxinas, este libro trata dun topos universal e particularmente próximo á infancia, ofrecendo, cun rexistro sustentado pola metáfora, unha profunda reflexión sobre a maternidade en toda a súa extensión”. Ademais foi merecedor do VI Premio Internacional Compostela para álbums ilustrados no ano 2013.

Potencialidades educativas: mediante este libro os nenos e nenas poden entender mellor o fermoso vínculo entre unha nai e o seu fillo/a, o amor incondicional dela e a entrega que cara a el/a demostra ao longo da vida (traelo ao mundo, protexelo, mostrarlle o camiño a seguir etc.). Así mesmo, os nenos e nenas, a través da lectura deste tenro conto, poden explicar cal é a relación que teñen coas súas nais, falar sobre os sentimentos e a afectividade. No libro tamén ten unha especial presenza a natureza e os animais, o que poderá ser aproveitado para sensibilizar sobre a necesidade de respecto ao medio e aos seus habitantes, ademais de aprender cos nosos alumnos e alumnas aspectos da vida destes e as súas crías.

Recursos educativos:
Contacontos realizado por “canto conto canto?” (2017) Mamá: https://www.youtube.com/watch?v=so0NUaYmY_I (consultado o 08/03/2018).

Contacontos realizado pola biblioponte de Lugo (2014) Mamá: https://www.youtube.com/watch?v=uuOVJwOlqxk (consultado o 08/03/2018).

Rodrigues, Carina (2015). “Canto sinxelo á maternidade”. En Mociño e Roig (coords.). Libros en galego de onte e hoxe para a nenez e a mocidade. Santiago de Compostela: Universidade de Santiago de Compostela, pp. 65-66.

Senís Fernández, Juan (2014). “El álbum ilustrado como agente de educación artístico-literaria y de género. El caso de Mamá de Mariana Ruíz Jhonson”. Dossiers Feministes, 19, 115-133.