Amosando publicacións coa etiqueta Vocabulario. Amosar todas as publicacións
Amosando publicacións coa etiqueta Vocabulario. Amosar todas as publicacións

domingo, 8 de abril de 2018

Quen é ese becho?





Queralt, Carmen (2014). Quen é ese becho? Trad. Manuela Rodríguez. Pontevedra: Kalandraka,
[23 pp.], (ISBN: 978-84-8464-899-4).

Descrición breve do formato e contido da obra: este álbum ilustrado ten a cuberta, a contracuberta e mais o resto das páxinas de cartón groso, o que fai que os nenos poidan manipular o libro dunha maneira moito máis cómoda. No referido ás ilustracións, as tonalidades empregadas son moi variadas, aínda que predominan o vermello e o verde nos fondos. Os debuxos son abstractos e, aínda que pode parecer que buscan facer referencia a insectos, en realidade o que se pretende con estes personaxes aleatorios é dar a coñecer a diversidade como algo bo que aporta riqueza ao mundo. Tal como destacan no Informe de Literatura 2014 (Roig, 2015), nas ilustracións emprégase a técnica da colaxe a partir de texturas que lle ofrecen os diferentes papeis e tamén as ceras de cores. As personaxes están realizadas dun xeito moi sinxelo e recordan ós debuxos infantís, mentres que as cores son saturadas e de tons escuros, combinados con vermello ou rosado, e o texto aparece sobre fondos planos da imaxe cunha tipografía que lembra o estampado.
En canto ao texto, utilízanse letras maiúsculas grandes que poden facilitar a comprensión e
recoñecemento dos máis pequenos, pois aínda que hai algunhas páxinas nas que aparecen frases,
na maioría dos casos só aparece unha palabra (un adxectivo), de maneira que chama a atención dos
nenos e fomenta que se busque o recoñecemento. Na última páxina a cor do texto cambia e vólvese
branco, para destacar a mensaxe: “o becho máis becho de todos es ti”. Isto faise coa intención de
interpelar ó lector para que este se decate de que tamén ten algo único e especial que aportarlle ao
mundo e por iso debería engadir unha foto súa no libro. Por todo o dito, a lectura desta obra pon en
valor a diversidade e ao aprender a apreciar aos demais, os nenos tamén deberán valorarse a si mesmos,
de aí a imaxe final do libro.

Potencialidades educativas: o que se pretende principalmente con este libro é que os nenos e as nenas sexan capaces de ver que son especiais e únicos, e non por iso mellores ou peores que os demais. Desta maneira poderemos mellorar as relacións entre os nenos, potenciando o respecto e a colaboración entre eles. Á parte, grazas a este libro poderán aprender partes do corpo e non só do seu, senón tamén dalgúns insectos, o que lles servirá para coñecer mellor o medio no que viven. Por todo isto consideramos que é un bo material para traballar nunha xornada ao aire libre, potenciando aspectos como a interacción coa contorna e o coñecemento dos animais.

Recursos de interese:
  • Martínez Montero, Pili (2017). Quen é ese becho. Interpretación do conto, personalizándoo coas
imaxes do alumnado dun colexio galego. En https://www.youtube.com/watch?v=cbZt9wrj6hU
(consultado o 30/03/2018).
  • Roig Rechou, Blanca-Ana (2015). Informe de literatura 2014. En
http://www.cirp.gal/rec2/informes/informes.html (consultado o 06/04/2018).

venres, 2 de marzo de 2018

¡Porque te quero tanto!





Van Genechten, Guido (2003). ¡Porque te quero tanto!, ilust. Clavis, trad. Xosé A. Neira Cruz, Zaragoza: Edelvives, (0-6 anos), [28 pp.]. (ISBN: 84-263-4970-6).


 Descrición do formato e contido da obra: álbum ilustrado de formato rectangular (33x24 cm), de gran tamaño e tapa dura. Na cuberta observamos unha imaxe dunha nai osa e o seu fillo, de textura suave, dándose un bico sobre un fondo de cor azul ceo e caéndolles a neve. Enriba deles, o título aparece en letra grande e entre exclamacións (¡Porque te quero tanto!). Na contracuberta aparece o osiño na parte inferior, que está dentro dun círculo branco debuxando nun papel un corazón, e un breve resumo do contido da obra na parte superior. Nas gardas aparecen diversos debuxos do osiño facendo diferentes accións, nubes azuis e corazóns, todo sobre un fondo branco. No interior do libro as páxinas son grosas e as ilustracións son orixinais, de gran tamaño e  predominan as cores brancas e azuis. Os textos son sinxelos, breves e de cor negra situados nas páxinas pares. Algúns aparecen na parte superior e outros na parte inferior. A textura que convida a acariciar ou sentir o tacto do protagonista é veludo.
A historia recrea o proceso de aprendizaxe do osiño protagonista, que aínda que sabía moitas cousas, había outras que non comprendía ben. Por iso lle preguntaba á súa nai, como por exemplo de onde sae a neve. Porén, a resposta máis importante si que a sabía: o amor que sente a súa nai por el.

Pontencialidades: atopámonos ante unha obra que trata diferentes temas de interese (amor, familia, neve, texturas etc), coa cal os nenos e nenas poden interaccionar. O que se pode traballar con ela son: as inquietudes que teñen as crianzas, representadas a través das diversas preguntas que fai o osiño. Desta forma, os cativos e cativas poderán comprender que cada día ten novas aprendizaxes e que facer preguntas é a mellor forma para descubrilas. Tamén a importancia do amor entre os membros da familia especialmente en idades temperás, a pesar de que non saberán responder a todas as preguntas, farán todo o posible por axudar aos cativos e cativas a elaborar da mellor forma posible a construción do mundo que os rodea. Outros temas que se pode traballar co conto son as texturas, xa que constantemente se pode tocar o osiño que está moi suave, para así desenvolver o sentido do tacto. Tamén se poden abordar fenómenos metereolóxicos como a neve e fomentar o emprego e aprendizaxe da nosa lingua.

Recursos de interese:
Iglesias, A. (2017). ¡Porque te quero tanto! Primeiras lecturas. Recuperado de: https://primeiraslecturas.blogspot.com.es/search?q=porque+te+quero+tanto
(consultado o 28/02/2018).