Amosando publicacións coa etiqueta Separación. Amosar todas as publicacións
Amosando publicacións coa etiqueta Separación. Amosar todas as publicacións

sábado, 17 de marzo de 2018

Vaya lío de familia!



 


Francotte, Pascale (2008). ¡Vaya lío de familia! Ilust. da autora, trad. Lara Toro. Barcelona: Editorial La Galera. [24 pp.]. (ISBN: 978-84-246-2924-7).


Breve descrición do formato e do contido da obra: álbum ilustrado rectangular de medidas 24,0 x 16,5 cm. Conta cunha cuberta e contracuberta de fondo branco. Na primeira atopamos a imaxe de dous adultos (un home e unha muller) e dous nenos (un neno e unha nena). A imaxe transmítenos o momento en que se intenta conseguir un clima de confianza: un home achega a seu fillo fronte a unha muller que lle sinala que vaia onda ela, mentres que una nena se agocha detrás da mesma. É unha imaxe que nos adianta a temática central da obra, ao suxerirnos  de forma bastante clara o tema principal da historia. Ademais tamén está incluída dentro do libro. Na contracuberta atoparemos soamente un breve resumo da historia xunto con dúas preguntas que invitan a ler a obra para poder contestalas. As ilustracións son imaxes que semellan debuxos en grafo, acompañan ao texto e dan visibilidade á historia. Todas as páxinas do libro teñen un fondo neutro, semellando unha folla en branco que se enche de cor grazas aos debuxos con lápis de cores claras. A escritora Pascale Francotte plásmanos a emotiva e terna historia en castelán dun neno que ve como,  tras a separación dos seus pais, a familia se vai ampliando con membros procedentes doutras. O seu pai preséntalle a unha nova parella, que xa ten unha filla, Eulalia. Aínda que ao protagonista lle gusta xogar con ela, está preocupado porque non quere que a moza do seu papá ocupe o lugar da súa mamá. Ademais, outra das incertezas que vive é o feito de que súa nai terá un fillo co seu novo compañeiro, polo tanto a posibilidade de ter un novo irmán prodúcelle unha inmensa alegría e tamén certo desconcerto. Por todo isto, o protagonista da historia acaba reflexionando e argumentando que a vida é fantástica malia ser moi complicada.


Potencialidades educativas: que papá e mamá se separen ou se divorcien forma parte da vida de moitos nenos e nenas. Ás veces víveno na súa propia pel, pero outras veces será un amigo ou un primo quen estea pasando por esa desconcertante situación por iso é interesante a lectura destes  libro non soamente aos nenos que pasan por este proceso, senón a todos e todas. Este libro ilustrado axuda a que os máis pequenos e pequenas cheguen a entender as consecuencias dunha separación, que mamá ou papá poidan ter novos compañeiros ou compañeiras ou que outras persoas comecen a formar parte das súas vidas, vendo que isto non supón unha desgraza, senón un motivo para estar felices, xa que coñecerán novas persoas que pasarán a ser membros da familia e a integrar os seus círculos afectivos e emocionais.


Recursos educativos:
Web onde se recomendan diferentes libros dedicados ao mesmo tema que ¡Vaya lío de familia!: http://www.agapeacultura.com/noticias/mis-papas-se-separan-recursos-infantiles-para-la-familia-n849 (Consultado 08/03/2018).

martes, 6 de marzo de 2018

Cuando mis padres dejaron de ser amigos


Moore-Mallinos, Jennifer (2006). Cuando mis padres dejaron de ser amigos. Ilustr. Marta Fábrega, trad. Carlos Ganzinelli. Barcelona: Edebé, col. Díselo a alguien, [29 pp.]. (ISBN: 84-236-7884-9).

Breve descrición do formato e contido da obra:
conto narrativo en castelán, de tamaño medio (24 x 24 cm) e consta de 29 páxinas. A cuberta e a contracuberta son de tapa dura. Na cuberta vemos o título e un debuxo da nena protagonista da historia e na contracuberta aparece a imaxe da nena e a súa nai xogando, ademais dun breve resumo da historia. A organización do conto asenta na distribución de texto e imaxe en páxinas consecutivas. No final do conto podemos atopar unha breve guía para os pais. No interior do libro, as ilustracións conteñen moitos detalles e son moi realistas e descritivas, con cores pasteis.
En canto ao contido da obra, trátase dunha historia realista dende os ollos dunha nena que está a vivir o proceso de separación dos seus pais. A historia comeza coa nena contando como era a vida cos seus pais, conta que xogaban xuntos, vían a televisión… ata que comezan as discusións, que ela escoita dende o seu cuarto. Narra coma todo vai cambiando drasticamente. A nena chega a ver á súa nai chorando e non entende nada, séntense culpable polo que acontece no fogar e pensa que é polas súas cualificacións na escola ou pola súa conduta. O conto pon de relevo como a nena asociaba a separación cun problema de ruptura de amizade entre os seus proxenitores, que discutían, enfadábanse e non falaban. Conta como o pai marcha da casa e a explicación que lle dan da situación: non é culpa súa, senón que ás veces os pais se levan mellor vivindo en casas separadas, aínda que iso non ía cambiar o amor que tiñan por ela. Despois deste feito, a nena conta que os seus pais xa non están tristes, que comparte momentos con ambos por separado e que agora ten dous fogares. Tamén relata que cando ten un partido de baloncesto ou no seu aniversario, os pais se xuntan para estar con ela e que incluso xogan xuntos ou ven a televisión coma antes. A historia remata coa nena entendendo que seus pais sempre van estar aí para ela sen importar o pasado e que quere aos dous por igual.

Potencialidades educativas: este conto serve para explicarlles aos nenos/as a separación dos pais e é un bo recurso para os nenos/as que teñen aos seus pais separados ou estean separándose, xa que se sentirán identificados/as coa protagonista deste conto. Tamén se pode tratar o tema das emocións, que senten os protagonistas nas diferentes fases do proceso de separación e os cambios sociais que provocan estas situacións.

Recursos de interese:
Representación teatral escolar en castelán en Youtube:
https://www.youtube.com/watch?v=f9l3Hz5sQFo (consultado o 23/02/18)