Amosando publicacións coa etiqueta Pictogramas. Amosar todas as publicacións
Amosando publicacións coa etiqueta Pictogramas. Amosar todas as publicacións

domingo, 22 de abril de 2018

El astronauta

Comendador, Carlos (2015). El astronauta. Ilust. é o autor. Andalucía: Sallybooks, [34 pp.]. (ISBN: 978-84-943381-6-8). Contén pictogramas.

Breve descrición do formato e contido da obra: álbum ilustrado de tapa dura. Na súa cuberta pódese observar o espazo e un foguete nel. A letra que conforma o título e grosa e de gran tamaño. Na súa contracuberta vólvese ver o espazo e una frase que resume a historia. As súas gardas son simples dunha  cor turquesa. A súa portada presenta, baixo o título, a cabeza do personaxe. As ilustracións que o conforman son minimalistas, e as cores que as conforman son vermella, branca, negra e azul.
O texto atópanse na parte baixa da páxina e está acompañado de pictogramas, cabe destacar que graza ás  imaxes e pictogramas do texto o libro pode ser lido por calquera idade e persoa (dado que non precisa do texto para á súa comprensión), atendendo así á diversidade e inclusión.
Un neno soña toda a súa infancia con ser astronauta. Crece, casa e forma unha familia, pero segue soñando con ser astronauta. Deseña e constrúe seu foguete e lánzase ó espazo. Alí viaxou e aterrizou nun planeta onde vivían extraterrestres e descubriu que non eran tan diferentes a nós, eles tamén tiñan familias. É nese intre é cando se da conta de canto vota de menos á súa muller e ao seu fillo e decide voltar. É unha aventura fantástica na que a viaxe exterior é unha escusa, na metáfora da viaxe interior do protagonista que remata ensinando a importancia, non só de seguir os nosos soños, senón do valorar do que temos cerca de nós no noso entorno máis cotiá, no noso día a día. Unha historia, en definitiva, sobre a importancia de atoparse a un mesmo.

Potencialidades educativas: na elaboración do libro colaboraron unha especialista de audición e linguaxe e a asociación Mírame (Asociación de Apoyo a Familias y Personas con Trastornos del Espectro Autista de Granada). Carlos Comendador invita a superar os prexuízos, as ideas preestablecidas e o medo ao diferente. É un libro que transmite unha mensaxe universal sobre o amor, a aceptación dos outros e dun mesmo e a importancia de perseguir os nosos soños.
Outro factor a destacar é o feito de ser unha obra dirixida a todos os públicos, especialmente destinada a nenos con necesidades educativas especiais. Os pictogramas, que constitúen unha linguaxe por si mesmos, describen e aclaran o resto de elementos e facilitan a compresión total da historia. Polo cal non só é válido para os nenos que precisen esta ferramenta, senón que resulta un sistema ideal para os prelectores e primeros lectores, facendo así que poida ser lida por calquera idade e persoa.
Recursos atopados:

Booktrailer publicado por Sallybooks. https://www.youtube.com/watch?v=TRDXauPG0KI (Consultado o 17/04/2018)

luns, 5 de marzo de 2018

Caracol e Formiga





Quintero, Armando (2008), Caracol e formiga, ilust. André Letria, Pontevedra: OQO Editora, [23 pp.] (ISBN: 978-84-96788-80-0). 


Breve descrición do formato e o contido: álbum ilustrado de tipo narrativo de follas de cartón duras cos cantos redondeados, cunha dimensión de 16 x 17 cm. Na cuberta aparecen os protagonistas da historia sobre un fondo de cor salmón; por un lado, vemos a formiga, caracterizada cun casco amarelo de obra e unhas zapatillas brancas e, pola marxe dereita, asómanse, grandes e redondos, os ollos do caracol. 

En canto ao seu ilustrador, André Letria, as súas ilustracións atópanse en páxinas de libros e xornais desde 1992. Ten libros en diferentes idiomas (inglés, italiano ou portugués). Gañou diversos premios polo seu traballo, como o Premio Nacional de Ilustración en 2000 ou o Premio de Excelencia en Ilustración, atribuído pola Society for News Design (EEUU). Dirixiu películas animadas e no 2010 creou a editorial Pato Lóxico. Este autor, neste álbum emprega diferentes tons pasteis e cores apagadas, cun formato bastante minimalista onde, sobre un fondo neutro de cor ocre ou salmón na maior parte das páxinas, só aparece o esencial. En canto ás ilustracións, son a dobre páxina e utilízanse elementos propios dos seres humanos, como zapatillas, un casco de obra ou un bigote para darlle un ton humorístico a toda a obra. 

Tamén se utiliza diferentes planos para axudar a focalizar a atención naquilo que se está a describir no texto (A formiga vai rapidiña: só aparece o corpo da formiga; o caracol vai lento: só aparece a súa cabeza). As personaxes son moi expresivas e utilizan tanto partes da cara como do corpo para acompañar o que di o texto, como se mostra na seguinte imaxe: 




En canto á tipografía, trátase dunha historia narrada en terceira persoa onde abundan os adxectivos, nomes e relacións temporais e espaciais, así como os diálogos entre os personaxes, que aparecen resaltados en negriña. En relación ao seu contido, trátase dunha historia onde dous amigos que van dando un paseo polo bosque ven un lago e, unha vez aló, aparece unha pomba, quen lles axudará a coñecer mellor a natureza e tamén a eles mesmos. 

A historia comeza presentando os personaxes e as súas características, o Caracol que anda amodo coa súa casa ao lombo, e a Formiga, que vai rápida e lixeira coas súas patiñas, o que non lles impide estar sempre xuntos, como bos amigos. Un día que paseaban polo bosque, viron un lago e decidiron ir a bañarse. Cando chegaron á beira, puxéronse a discutir sobre quen tiña que probar primeiro a auga, cando, de súpeto, apareceu unha pomba e díxolles, - Pero vós que facedes? As formigas e os caracois non se bañan, e achegouse ao lago a beber. É entón cando a Formiga lle pregunta – Non tes medo dos crocodilos? –Isto non é un lago. Nos charcos non hai crocodilos- díxolle a pomba. Entón, caracol e formiga quedaron sentados na beira do “lago” vendo como se deitaba o sol no horizonte, onde, na marxe dereita, curiosamente, aparece un peixe saltando. 

Potencialidades 

É un conto fácil de entender xa que emprega palabras sinxelas onde abundan os diálogos, que axilizan o ritmo da narración. 

Ao tratarse dun álbum ilustrado, tanto as imaxes coma o texto están complementados e facilitan a compresión da historia. 

Trabállanse aspectos do currículo como son tamaños (grande, mediano e pequeno), posicións (arriba e abaixo), temperatura( frío ou quente) e velocidades (rápido ou lento). 

Permite traballar o concepto do día fronte ao de noite (cando quedan mirando como se esconde o sol). 

Achegamos aos nenos/as o coñecemento da nosa contorna natural máis próxima, tanto polos protagonistas, que son animais cos que seguro tiveron contacto algunha vez (formiga, caracol e pomba), coma polo elemento ao redor do que xira a historia, un “charco”. 

Axuda a entender a importancia da amizade, neste caso, entre dous animais de razas diferentes (caracol e formiga) con características diferentes (un é rápido e o outro lento) que gozan da natureza en compañía. 

Mostra como non todos vemos o mundo da mesmo xeito, senón que existen diferentes perspectivas ou puntos de vista (eles ven un lago porque son pequenos e non poden voar, pero a pomba, por ser máis grande e poder voar, sabe que é un charco), a pesar de que, ao final da historia, o autor debuxa a un peixe saltando, o que reflicte a subxectividade do que pode ver cada un de nós. 

Posúe recursos en liña como é a adaptación con pictogramas e o vídeo do álbum ilustrado. 

Podemos atopalo en diferentes idiomas, como o castelán ou o portugués. 

Recursos: