Rubio, Antonio (2006). O poliño da abeleira. Ilust. Gabriel Pacheco,
trad. Silvia Pérez. Pontevedra: Kalandraka Editora, col. Contos do trasno, [32
pp.]. (ISBN: 978-84-8464-531-3).
Descrición breve do formato e contido da
obra: álbum ilustrado encadernado en cartoné,
cunhas dimensións de 22x22 cm. Na cuberta atopamos un debuxo da maioría dos
personaxes que aparecen na historia: a dona da casa, a galiña, o poliño, a
abelá, a cabra e o zapateiro; dispostos de maneira circular. No medio da ilustración tamén aparece o
título, o nome dos creadores e da editorial. Se abrimos o libro completamente,
descubrimos que a contracuberta forma unha unidade coa cuberta, pois hai un pé
do zapateiro máis algunhas plumas da galiña. Ao abrir o álbum atopamos as
gardas: tanto as primeiras como as últimas son semellantes, a diferenza é que
nas primeiras aparece no recuncho inferior esquerdo un bolso e uns calcetíns;
mentres que nas últimas só hai un calcetín no recuncho inferior dereito. Xa no
interior, preséntasenos un texto dialogado con letra en cor negra. Trátase dun
relato rimado de estrutura acumulativa e circular, cun ritmo marcado pola
repetición de versos de retrouso. Os debuxos, todos eles a dobre páxina, son
dinámicos e caricaturescos, pois buscan o movemento dos personaxes e dos
elementos que neles aparecen. O fondo das páxinas é claro para evitar a
saturación, mentres que as ilustracións, pintadas a témpera, teñen tons máis
rechamantes para manter a atención dos lectores. Complementan a información que
se menciona no texto, fomentando desta maneira a imaxinación tanto de oíntes
coma de lectores. O álbum conta a historia dunha galiña que se ve na
obriga de acudir a diferentes personaxes para que a axuden a salvar o seu
poliño. Cada un deles debe proporcionarlle un
elemento que a súa vez é necesario para que outro poida realizar unha determinada
función: a nube debe dar auga para que medre a herba do prado, que a súa vez
debe alimentar a cabra para que lle dea o coiro que o zapateiro precisa para
facer os zapatos da dona da abeleira, onde comen a galiña e o poliño.
Potencialidades educativas: este álbum ilustrado é unha adaptación dun conto
tradicional orixinario de Cuenca, que conta cun texto rimado e acumulativo co
que os alumnos e alumnas poden enumerar os personaxes que axudan á galiña a
salvar o seu poliño. Ten ademais versos de retrouso na maioría das páxinas (“E non se faga de rogar, que pode afogar”) que fomentan a participación e
captan a atención dos cativos e cativas, facilitando desta maneira a súa
aprendizaxe da historia. Pode utilizarse para traballar a partir da súa lectura
temas como a natureza, os animais, os oficios... Atópase dispoñible en tres
idiomas: galego, castelán e italiano. Tamén cómpre destacar os premios que
recibiu o álbum: Recomendación de lectura (Premio FNLIJ Brasil) en 2009 e Selección
Ministerio de Educación (Arxentina) en 2014.
Recursos en liña:
- Asunción e María (2017). Videoconto (castelán): https://www.youtube.com/watch?v=Fq6LMLHtrWc (consultado o 14 de marzo de 2018).
- Caboblanco, Javier (2014). Dramatización do conto (castelán): https://www.youtube.com/watch?v=V4uUYHrDKZg (consultado o 14 de marzo de 2018).
Ningún comentario:
Publicar un comentario