Un pesadelo no meu armario

Mayer, Mercer (2001), Un pesadelo no meu armario, ilust. do autor, trad. Xosé Manuel González. Pontevedra: Kalandraka, col. Libros para soñar, [36 pp.]. (ISBN: 978-84-8464-101-8).

Breve descrición do formato e do contido: álbum ilustrado de tamaño grande, traducido do inglés, que conta con versións en  galego, éuscaro, catalán, portugués, italiano e castelán. Foi recoñecido pola súa calidade literaria e estética e forma  parte do Plan Nacional de Lectura (SEP México)-2003 e do Plan Nacional de Leitura (PLN Portugal).

Está formado por tapas duras e de cantos rectos. Na cuberta atopámonos con ambos os protagonistas da historia, o neno e mailo monstro, nun espazo da habitación; na contracuberta, a imaxe do monstro dentro do armario. As gardas de cor verde, recordando a cor do monstro que se esconde no armario. Na portada unha imaxe do armario aberto que anima a avanzar no libro e descubrir a historia, acompañada do título da obra e nome do autor.

O texto que presenta é breve, de fácil comprensión e efectivo. Este acábase completando coas imaxes. As ilustracións son de gran relevancia nesta obra. O autor xoga co tamaño dos planos, pasando dun plano xeral a un curto, para dar a sensación de medo e tensión que o neno experimenta. As cores, empregadas para diferenciar o territorio do neno e do monstro, sendo así o do neno maioritariamente en tons alaranxaros e o do monstro maioritariamente verdes. As ilustracións xogan coas cores no momento no que o monstro está entrando no territorio do neno e este deixa de lle ter medo, pois comeza a tornar nun ton máis alaranxado.

Son importantes tamén aspectos das ilustracións como os sentimentos e emocións que queren transmitir, pasando do medo, ao enfado, á alegría, á pena para finalmente acabar a historia cun final feliz e detalles finais como o novo monstro que aparece cando os protagonistas xa están na cama.

A historia comeza co neno deitado na cama e a porta do armario aberta. O cativo  todas as noites pasa medo porque sabe que hai un pesadelo no armario do que sente moito pánico. Un día o neno decide enfrontarse a el, mais finalmente acabará cedéndolle un espazo no seu leito. Pero, habería só un monstro no armario? O asunto principal da obra é transmitir os sentimentos do neno e do monstro, que mediante texto e ilustracións se consegue.

Potencialidades: coa temática do libro pódense traballar as emocións, principalmente a do medo, aínda que  no transcurso da historia aparecen outras, que as nenas e nenos poden identificar. O texto, sinxelo, axuda a comprender perfectamente a historia, e as imaxes, expresivas e rechamantes atraerán o interese das cativas e cativos facendo así que complementen a historia e que entendan todo moito mellor.