Sen rumbo polo mundo, Catarina e o Oso.

Pieper, Christiane. (2015). Sen rumbo polo mundo, Catarina e o Oso. Ilustr. da autora, Trad. Pepe Martínez García. Pontevedra: Kalandraka, col. demandemora, [32pp.] (ISBN: 978-84-95123-20-6).

Breve descrición do formato e contido: álbum ilustrado de tapa dura que permite un manexo sinxelo e cómodo para os máis pequenos e pequenas. As imaxes son moi vistosas e ben definidas. Representan moi ben o que quere contar a historia e proporciónannos máis información da que se mostra no texto. Cada unha das imaxes ocupa dúas páxinas e nelas móstrase as aventuras polas que pasan os protagonistas, recreando detalles sobre as súa accións e o escenario que os rodea, ademais de proporcionar información sobre unha paisaxe moi colorida e ben definida. O texto é fácil de comprender.

O conto narra a historia dunha rapaza que un día decidiu seguir a un oso. Nese momento enfráscanse nunha aventura moi divertida e lúdica xa que viaxan polo mundo, coñecendo diferentes culturas, lugares, animais...

Unha das cousas que máis destacan no que se nos conta é que os personaxes imitan os comportamentos, accións ou formas de camiñar das persoas ou animais cos que se atopan na súa viaxe. Ambos percorren moitos e característicos lugares como o mar, a montaña, o deserto... ensinándonos as curiosidades coas que se cruzan e o ben que o pasan.

Potencialidades educativas: é un álbum moi vistoso para os nenos e para as nenas por moitos motivos. Primeiro porque poden coñecer diferentes lugares do mundo, coas súas características (mar, deserto, cidades) e as súas culturas. Segundo porque nos mostra indirectamente a relación de amizade que teñen o oso e a rapaza, xa que en ningún momento se di directamente pero é algo que podemos observar porque o pasan moi ben xuntos e non se separan. E terceiro que nos ofrece diferentes posibilidades de xogos, por exemplo, buscar nas imaxes distintos elementos que caracterizan cada lugar, atopar cal é o animal ou persoa que están imitando e porqué o imitan ou tamén pedirlles que inventen unha historia sobre o que poden vivir os personaxes en cada localización.

Este álbum ilustrado conta cunha segunda parte chamada Catalina, o Oso e Pedro na que un novo compañeiro se une ás aventuras dos nosos protagonistas demostrándonos que as barreiras físicas non son un problema para gozar e aprender cada día da vida.

Recursos de interese:

• Barros, Antía (2017). “Sen rumbo polo mundo, Catarina e o Oso.” En PrimeirasLecturas. Recuperado de https://primeiraslecturas.blogspot.com.es/2017/02/sen-rumbo-polo-mundo-catarina-e-o-oso.html