Van
Genechten, Guido. (2005). ¿Por
qué, mamá?, Ilust. do autor, trad., Agustín Gervás Sánchez.Zaragoza:
Edelvives, [12 pp.]. (ISBN: 84-263-5926-4).
Descrición do formato e contido da obra: libro pop-up de 25cm x 25cm, con forma
cadrada e encadernado con tapa dura. Na cuberta pódese visualizar a mamá oso e
ao seu fillo. O título aparece na parte superior dereita, sendo maior o tamaño
da palabra mamá, dando a entender que é o máis significativo. En canto ao nome
do autor, atópase na marxe inferior esquerda. A contracuberta mostra os datos
máis relevantes da obra, como son nome do autor, editorial, data e lugar de
edición, entre outros. A obra consta de 12 páxinas nas que o texto e as
ilustracións van mudando de lugar en cada unha das páxinas. As ilustracións son
a dobre páxina con debuxos sinxelos do osiño e a súa nai en diferentes
situacións, sendo fieis á realidade. Emprégase a técnica pop-up para dotalas de
movemento, o que fai que sexan máis atractivas, á vez que as cores empregadas son cálidas.
O texto está
formado por frases moi curtas, o que lle
dá maior relevancia ás ilustracións. A
obra relata a historia dun osiño que sabe moitas cousas: onde se esconden os
peixes máis deliciosos e como pescalos, como deslizarse por unha ladeira sen
mancarse etc. Malia todo, faille unha morea de preguntas á súa nai porque non
comprende algunhas cousas, como por exemplo de onde vén a neve. Ao final da
obra, demostra que a resposta á pregunta máis importante si que a sabe: sabe
que a súa nai o quere moito porque é o seu fillo.
Potencialidades educativas: con este libro pódese traballar o amor e o cariño que existe entre as nais e os fillos e, en xeral, entre os membros dunha familia. O álbum propicia a reflexión sobre a afectividade, as relacións intrafamiliares e a relevancia que teñen nas nosas vidas as persoas que forman parte dos nosos círculos afectivos, nos que nos desenvolvemos e sentimos protexidos. Compartir e verbalizar os afectos é un aspecto fundamental na infancia, así como coñecer as familias e os diferentes tipos de relacións sociais que establecemos a medida que medramos. Compartir estes referentes e a importancia que teñen na nosa vida é unha forma de valorar o seu afecto e protección, ao igual que ocorre ao longo da lectura do álbum. Así mesmo, a través do conto poderáselles ensinar a que perdan o medo de preguntar todo aquilo que se lles pase pola cabeza sen temor ao que lles poidan contestar, fomentando a súa curiosidade e espírito crítico.
Recursos:
Data de consulta
27 de Febreiro de 2018
Ningún comentario:
Publicar un comentario