Nadarín

Lionni, Leo (2007), Nadarín, ilust.do autor, trad. Xosé Manuel González Barreiro. Pontevedra: Kalandraka Editora, col. Tras os montes, [30 pp.]. (ISBN: 978-84-8464-628-0). 

Breve descrición do formato e contido: álbum ilustrado de formato rectangular (22 x 27,5 cm.). Posúe unha cuberta e contracuberta de cartón duro para favorecer a manipulación por parte dos nenos e nenas. A cuberta fainos intuír como serán as ilustracións que atoparemos ao longo de todo o volume. Trátase de imaxes que semellan estar pintadas con acuarelas e onde predominan as cores azuis, verdes, grises e vermellas fundamentalmente. Son ilustracións que chaman a atención e convidan a deterse minutos observando cada un dos detalles presentes. Así mesmo, as imaxes reforzan e clarifican o que se narra no texto, facilitando a interpretación do conto. 

Este conto relata a historia dun peixe chamado Nadarín que se atopaba nadando cos seus irmáns e irmás. Un mal día, apareceu un atún rabioso e moi famento que dun bocado tragou a todos os peixiños vermellos, só Nadarín deu fuxido cara ás profundidades xa que nadaba moi ben. Agora estaba só, triste e asustado, pero pouco a pouco Nadarín volveu ser feliz porque vai nadando polo mar e atopándose con fermosas criaturas (unha auga mar, unha lagosta, estraños peixes, un bosque de algas, unha anguía, anemones...). Agochado entre as rochas e as algas atopou un banco de peixes igualiños a el e ofreceulles nadar, xogar e ver cousas con el. Non obstante os peixes rexeitaron a súa invitación xa que tiñan medo de que o gran peixe os comera. Nadarín convénceos para nadar todos xuntos como se fosen o peixe máis grande do mar e el sería o ollo e cando atoparon ao gran peixe escorrentárono. 

Potencialidades educativas: este libro sérvenos para traballar cos nenos e nenas o tema do mar, ampliando vocabulario, aprendendo que animais viven aí, como son, que comen, como se moven... Pero sobre todo este libro permítenos traballar o concepto de amizade, cooperación, a superación de medos ou a diversidade. No conto ponse de relevo que ser diferente non é negativo senón que o feito de ser diferentes nos fai a cada un de nós especiais, cada un temos as nosas propias virtudes e fortalezas que permiten enriquecernos os uns aos outros. Tamén amosa que a unión fai a forza e non sempre os “pequenos/as” teñen que temer aos “grandes”. Outro aspecto a traballar con este libro é a educación artística, xa que o uso de acuarelas permítenos propoñer actividades deste tipo para favorecer a expresión e a creatividade dos máis pequenos. Ademais, outra forma de traballar a creatividade sería a través dun teatro de sombras, xa que facilita a interpretación do conto ao xogar cos diferentes tamaños dos peixes. 

Recursos de interese: 

• Blog Aprender juntos (2016). Actividades para traballar co conto: http://www.aprenderjuntos.cl/nadarin-el-libro-de-la-semana/ (consultado o 26 de febreiro de 2018) 
• C.R.A Montearagón (2015). Conto Nadarín: https://www.youtube.com/watch?v=APQBO0Ap_o0&t=5s (consultado o 26 de febreiro de 2018) 
• Martínez, Maribel (2012). Mural Nadarín: http://cariciasencuentos.blogspot.com.es/2012/03/nadarin.html (consultado o 26 de febreiro de 2018) 
• Méndez, Berta (2011). Vídeo sobre o conto (castelán): https://www.youtube.com/watch?v=dBg5u52AXn4 (consultado o 26 de febreiro de 2018) 
• Pérez, Carmen (2010). Xogo Nadarín: http://auladeinfantil-carmen.blogspot.com.es/2010/05/nadarin-y-el-trabajo-en-equipo.html (consultado o 26 de febreiro de 2018) 
• Pintado, Elena (2017). Videoconto: http://www.auladeelena.com/2017/01/cuentame-un-cuento-nadarin.html (consultado o 26 de febreiro de 2018) 
• Velázquez, Jesús (2013). Corto “A unión fai a forza”: https://www.youtube.com/watch?v=S_tNeXKWxso (consultado o 26 de febreiro de 2018)