A escada vermella

Pérez, Fernando (2015). A Escada Vermella. Ilust. do autor. Trad. Manuela Rodríguez. Pontevedra: Kalandraka, col. demademora, [30 pp.]., (ISBN: 978-84-8464-950-2).

Breve descrición do formato e contido da obra: A escada vermella é un álbum ilustrado de tamaño de 20 x 20 cm. Na miña opinión,  a idade recomendada para ler este libro sería de 0 a 5 anos. O seu formato é cadrado e conta cunha cuberta e contracuberta de tapa dura. Na primeira aparece a imaxe do protagonista da historia, o título do álbum en letras vermellas e o nome do autor e editorial. Na segunda,  aparece o nome da colección e a imaxe do ceo, onde van ter lugar os feitos. No seu interior, as gardas recrean tamén a paisaxe onde se vai desenvolver a historia. As súas páxinas contan cun gran grosor, o que permiten unha doada manipulación.

O texto é moi sinxelo, dunha liña por folla. A súa letra é grande e está escrita en maiúsculas o que permite unha doada lectura para os máis pequenos. Está acompañado de ilustracións, o que permite aos lectores ir visualizando os feitos ao longo da obra. Estas son elaboradas con témpera e lápiz, predominando as cores intensas.  En todas as páxinas aparece o protagonista acompañado dun coello. Tanto a aparición dos protagonistas como do texto non seguen unha orde nas páxinas pares ou impares. 

A escada vermella representa as complicacións que nos pomos a nós mesmos para conseguir o que poderíamos lograr dunha forma máis doada se tivésemos confianza en nós mesmos. A cor vermella da escada fai referencia a forza, ao poder de superación. Con esta escada, o protagonista busca chegar a onde se propoña aínda que non confíe nas súas ás. A historia ten lugar no aire libre, o que permite ao protagonista ir cambiando de espazos constantemente comezando e rematando polo máis baixo como é o chan, pasando polo tellado dunha casa, ás árbores, ás nubes e á lúa.

O protagonista deste conto, un paxariño moi viaxeiro, quería chegar cada vez máis alto, ás nubes, á lúa… e para iso ía sempre acompañado dunha escada.

Un día, perdeu a escada, e un amigo del que o seguiu en todas as súas viaxes, viuno moi triste e aconselloulle que non o estivera que como bo paxaro el podía voar.

Potencialidades educativas: esta obra permite traballar cos nenos a autoestima, xa que mediante a anécdota do paxariño de non confiar en si mesmo en poder voar, se lle pode facer ver a importancia de valorarnos a nós mesmos, en crer en nós e nas nosas posibilidades, creando unha seguridade e confianza que lles vai permitir conseguir os seus obxectivos que sempre se propoñan. Por outro lado, é un libro que axuda a memoria dos nenos xa que se pode entender como un libro con estrutura repetitiva, é dicir, repite a mesma organización das escenas varias veces, como por exemplo “para subir aos tellados”, “para subir ás árbores”, “para subir ás nubes”. Con ela tamén se poden practicar conceptos como subir e baixar, as distancias e observar como cambian as cousas de tamaño en función da situación dende a que o vexamos.